نظرية المؤامرة
يا خبر إسود .. دا الناس كلها اتهبلت
راكب النهارده القطار راجع من الزقازيق فى نهاية الاسبوع و قا عد فى الكرسى اللى جنب الباب
دخلوا اتنين ستات معاهم كتاكيت وبيض و ملقوش حته فى القطر كله يوقفوا فيها غير جنبى
انا شوفت المنظر ده قولت بس انا قايم (بصوت عالى) الناس ضحكت
و مره واحده لقيت الراجل اللى قاعد جنبى (راجل كبير لابس كويس شعره ابيض شكله كده موظف بقالوا 50 سنه) بيقوللى: أنت بتصدق
قولتلوا : أفندم
قاللى انت مصدق حكاية انفلونزا الطيور دى
انا: امال ايه يعنى
هو : انت فى كليه ايه الاول
انا : هندسه
هو : يا استاذ يا متعلم دى مؤامره لضرب اقتصاد مصر
انا : هاا!!! ازاى يعنى
هو: من كام سنه الحكومه قالت على المشاريع الصغيرة للشباب بتاعت الفراخ اهو الموضوع دا بقى عشان يضربوا الاقتصاد
دى حكومه بنت كلب
انا: يا راجل… طيب اما انتوا عارفين انها حكومه بنت كلب سكتين ليه بقالكوا 25 سنه لغاية دلوقتى
هو : سكت و بص الناحية التانيه و عمل نفسه مسمعش من الدوشه
انا عايز افهم لغاية امتى كل ما حد ماسورة مياه تضرب فى بيته يقول دا الغرب عامل مخطط علييه
او واحد اشترى فاكهة بايظه البياع خموا فيها يقول دى اسرائيل اللى بعتاها
و اللى نازل من بيتهم اتكعبل فى طوبه تبقى امريكا اللى حطاها
يا جدعان حرام عليكوا بقى ارحمونا
February 22, 2006 + نشرت فى Egyptian Interior +
شكللك كده اسرائيلي متنكر في صورة واحد مصري
عارفينكوا ومكشوفة لعبتك يايهودي
:)
تعليق بواسطة Ahmed Shokeir — في 5:46 pm
و الله يا اخى انا بدأت اشك فى نفسى
تعليق بواسطة MeMo — في 12:35 am